Γράφει ο Δρ. Απόστολος Ε. Παπαφωτίου
1) Γεώργιος Φραντζῆς (Σφραντζῆς), Chronicon Maius, 365-379:
... καί τοιαύτην ἐλογίζετο μηχανήν, ἵνα μέρος τοῦ στόλου εἰσφέρῃ ἔσω τοῦ λιμένος. καί ἦν ὁ λόγος εὐθύς καί τό ἔργον, καί ἐκ τοῦ ὄπισθεν μέρους τοῦ Γαλατᾶ διά τοῦ λόφου ὁδόν εὐθεῖαν ᾠκονόμησεν ἕως τοῦ λιμένος ἐρχομένην, καί σανίσι καί ξύλοις πᾶσαν κατέστρωσεν, ἅς ἤλειψε σανίδας μετά στέατος βοῶν καί κριῶν· καί ὄργανα πολύτροπα ἕτερα ποιήσας καί μηχανάς, τάς τριήρεις καί διήρεις ἐν εὐκολίᾳ ἄνωθεν ἐν τῷ λόφῳ σύρας ἔσω ἐν τῷ λιμένι καταβιβάσας ἔφερεν αὐτάς. καί ἦν τό ἔργον θαυμαστόν καί ναυμαχίας στρατήγημα ἄριστον. ἐγώ δέ λογίζομαι, τόν Καίσαρα Αὔγουστον ἐμιμήσατο, ὅταν μετά τοῦ Ἀντωνίου καί Κλεοπάτρας ἐμάχετο, ὅς διά τόν σάλον τῆς θαλάσσης καί τούς ἐναντίους ἀνέμους οὐκ ἐδυνήθη περιοδεῦσαι κύκλωθεν τῆς νήσου τοῦ Πέλοπος, καί ἐλθών διά τοῦ Ἰσθμοῦ τάς νῆας σύρας ἔτι προς ἑώαν τῆς Ἑλλάδος θαλάσσης ταχέως ἐν τῇ Ἀσίᾳ ὁδεύει, ἤ καί τόν Νικητᾶν πατρίκιον, ὅταν καί αὐτός ἐκ τῆς Ἑλλαδικῆς θαλάσσης τάς τριήρεις ἐν τῇ δυτικῇ περάσας τούς Κρῆτας ἐν τῇ Μοθώνῃ καί Πύλῳ ἐτροπώσατο.